ИШИД террорчилик гуруҳи тарафдорлари Ироқнинг йириклиги бўйича 2-рақамли шаҳари – Мосулни 2014 йил июнда босиб олганидан то шу кунгача шаҳарда яшаган 837 аёлни ўлдирган. Бундай маълумотлар Ироқнинг Найнаво вилояти полиция бошқармасининг махсус ҳисоботида келтирилган. Мосул Найнаво вилоятининг пойтахти ҳисобланади.

Полиция бошқармаси бошлиғи Занун ас-Сабавийнинг айтишича, “бу вазиятда фақатгина жасади шаҳар ўликхонасига берилиб, у ерда қайд қилинган аёлларнинг ўлдирилганлиги тасдиқланган ҳолатлар ҳақида гап кетмоқда”. Ас-Сабавийнинг айтишича, кўпчилик аёллар ИШИД томонидан Мосулда шакллантирилган махсус шариат суди томонидан ҳукм чиқарилгандан кейин отиб ўлдирилганлар.

Ас-Сабавийнинг таъкидлашича, жангарилар томонидан ўлдирилган барча аёллар дунёвий касблар билан шуғулланишган. Асосан бу аёллар турли даражадаги сайлов қонунчилиги органлари, Мосул маъмурияти ходималари, вилоят сайлов комиссияси аъзолари, маҳаллий университет, мактаб ўқитувчилари, сартарашхона ва гўзаллик салонлари ходималари бўлган.