ИШИДни тарк этишга муваффақ бўлган собиқ жангарилар мутахассисларга террорчилик гуруҳининг ваҳшийликлари ва улар нима учун ИШИДни тарк этишга қарор қилишгани ҳақида сўзлаб беришди.

Террорчилик муаммоси бўйича олимлар Анна Спекхард ва Ахмет С. Яйла суриялик собиқ жангарилардан интервью олишди. Улар бу эркакларни Сурия-Туркия чегарасида аниқлашган.

Эркакларни ИШИД сафини тарк этишга ундаган асосий сабаб шундаки, гуруҳ жуда шафқатсиз ва ундаги ҳаёт тарзи улар тарғибот қилаётган “диний жаннат”дан анча йироқдир.

Собиқ жангарилар ИШИДнинг стратегиясини ташкил қилувчи унинг шафқатсизлигига аниқ мисоллар келтириб ўтдилар. “У ерда Хут деган қудуқ бор. Улар асирларнинг кўзларини боғлаб, уларга “Сен озодсан, бор кетавер, лекин кўзингни очма”, дейишарди. Асирлар кўзлари боғланган ҳолда кетишарди ва қудуққа қулардилар”, деб айтди эркаклардан бири. Унинг айтишича, бу қудуққа шу йўсинда 300 дан кўпроқ одам ташлаб юборилган.

Жангарилар шундай хатти-ҳаракатлар билан аҳолини қўрқувда ушлаб турган ва бошқа террорчилик гуруҳларини қўрқитган. Хусусан, қочоқлардан бири ИШИД икки йил аввал “Озод Сурия армияси”га қарши Раққа шаҳрида худкуш-болалардан фойдаланганини айтди.

Яна бир қочоқ жангарилар айб иш қилганларга нисбатан қўллаган жазолари ҳақида сўзлаб берди. “Агар кимдир ниманидир нотўғри қилган бўлса, улар уни сувда қийнашарди. Агар уларга кимдир ёқмаса, уни ўлдиришарди”, деб айтмоқда эркак.

Собиқ жангарилар ИШИДни ёлғончиликда ҳам айблашмоқда, улар жангариларнинг айтаётганлари ҳақиқий вазиятга мос келмаслигини таъкидламоқдалар. “2014 йилда мен ИШИД ёлғончилар эканлигини англадим. Мисол учун, бир аёлни зўрлаган бир йигитга ҳеч қандай жазо қўлланмаган”, деб айтмоқда эркаклардан бири.

Қочоқларнинг айтишича, ҳозирда гуруҳ Сурияда янги жангариларни ўз сафига ёллашда қийинчиликларга дуч келмоқда. Аввал калтафаҳм одамлар ИШИД сафига яхши ҳаёт излаб борган бўлса, ҳозирда босиб олинган ҳудудлардаги одамлар бошига тушган ночорлик ва бошқа мусибатлар босими остида бу “хом хаёллар” барбод бўлмоқда.