«Форсаж 7» кинокартинаси 2015 йилда интернет тармоқларида энг кўп юклаб олинган фильм бўлди. Бу ҳақда Exipio компанияси олиб борган тадқиқотларга асосланиб, Variety нашри хабар тарқатмоқда.

Вин Дизель, Пол Уокер, Жейсон Стейтэм ва Дуэйн Скала Жонсон каби актёрлар роль ижро этган «Форсаж»нинг еттинчи қисми легаллаштирилмаган талқини интернет орқали 44,8 миллион марта кўчириб олинган. Иккинчи ўринда қайд қилинган «Қасоскорлар: Альтрон эраси» фильми 42 миллион маротаба кўчирилган. Учинчи ўринда деярли 37 миллион марта юкланиб олинган «Юра даври дунёси» фильми жойлашган.

Тўртинчи ўриндаги «Mad Max: Fury Road» (Телба Мак: Ғазаб йўли) 36,5 миллион марта юкланган. Бешинчи ўринда — «Кулрангнинг 50 жилоси» (32 миллион марта юкланган) фильми жойлашган.

Exipio рейтингида 2014 йилда суратга олинган бир қатор кинолар ҳам жойлаштирилган. «Интерстеллар» икки йилда 46,8 миллион марта, «Америкалик снайпер» — 33,9 миллиона марта юклаб олинган.

Variety шарҳловчилари 2015 йилда “қароқчилик” йўли билан тармоқларга жойлаштириш сурати ўсганига алоҳида эътибор қаратган. 2013 йилда шу йўл билан энг кўп юклаб олинган «Уолл-стрит бўриси» киноси (30 млн. марта), 2015 йилги рейтингнинг кучли ўнлигига ҳам кира олмаганини таққослаб ўтган.