Парижда 13 ноябрь куни содир этилган терактлар вақтида "Батаклан" театрида бўлган қўшиқчи Лаура Круага 6та ўқ теккан ва у шу вақтгача кома ҳолатида қолиб келаётганди. У 27 декабрь куни комадан чиққан. Бу ҳақда Sunday Times хабар тарқатди.

31 ёшли актрисада 10 марта жарроҳлик амалиёти ўтказилган, улардан бири вақтида унинг юраги яқинидан ўқ олиб ташланган.

"Унинг биринчи бўлиб "нима бўлганини" сўради. У айни вақтда даҳшатни бошдан кечирмоқда. У ўша вақтда жуда кўп одамларнинг ўлдирилишига гувоҳ бўлган. У ҳозир жуда кўп савол бермоқда", дейди қўшиқчининг катта акаси Себастьян Круа.

Daily Mail нашри маълумотига кўра, бу аёлнинг аҳволи 10 декабрь кунидан бошлаб ўнглана бошлаган. Унинг қариндошлари у тўлиқ соғайиб, ўз фаолиятини давом эттира олишига ишонч билдиришмоқда. Улар бир йилдан кейин қўшиқчи бўлиб ўтган воқеалар таъсиридан халос бўлишига умид қилишмоқда.

Круа хоним Франция пойтахтидаги хунрезлик туфайли жароҳатланган 352 кишидан бири эди.

Парижда 13 ноябрь куни террорчилик ҳаракатлари кетма-кетлиги юз берди. Отишмалар, одамларни гаровга олиш ва портлашлар оқибатида 130 киши ҳалок бўлганди.