Британиялик Жон Биден (John Beeden) Шимолий Америкадан Австралияга ёлғиз ўзи қайиқда Тинч океани бўйлаб тўхтовсиз сузиб борган ер юзидаги илк одамга айланди. The Guardian нашрининг хабар беришича, саргузаштчи бунинг 209 кун вақт сарфлади. 

Биден саёҳатини июнь ойининг бошида Сан-Францискодан бошлаганди. Аввалига унинг сафарига 140дан 180 кунгача муддат кетиши ва октябрь ойи ўрталарига қадар давом этиши тахмин қилинганди. Бироқ об-ҳаво шароити туфайли у Кэрнс портига (Квинсленд штати, Австралия) фақатгина 27 декабрь куни етиб борди. 

Биден ўзининг олти метрлик Socks II қайиғида кунига 15 соат эшкак эшган. Ўз саёҳати давомида 53 ёшида саргузашт устаси 6,1 минг денгиз мили (11,2 минг километр) масофани босиб ўтган.

«Мен бу саёҳатни бу даражада қийин бўлади деб ўйламагандим. Бундай натижага эришган биринчи инсон бўлиш бу — ақлбовар қилмас натижа. Мен ҳозиргача бундай натижа қайд этганимга ишона олмаяпман», — дея таъкидлаган у. 

2001 йилда бошқа бир британиялик Жим Шехдар (Jim Shekhdar) Тинч океанни кесиб ўтган — у Жанубий Америкадан Австралияга саёҳат қилганди. Унинг саёҳати учун 274 кун вақт кетган.

2014 йилда қайиқда ёлғиз саёҳатга россиялик Федор Конюхов чиққан. Бидендан фарқли равишда, у Шимолий эмас, Жанубий Америкадан йўлга чиққан. 159 кун давомида Конюхов Чилининг Конкон шаҳридан Австралиянинг Мулулаба портигача етиб борган.