Янги йил арафасида байрам совғаси ўлароқ Россия президенти маъмурияти минглаб сиёсатчи ва амалдорларга “Дунёни ўзгартирувчи сўзлар” китобини тақдим этди. Мамлакат раҳбари Владимир Путиннинг иқтибосларидан иборат мазкур китоб “Сеть” ҳаракати томонидан йирик давлат гранти ҳисобига чоп этилди.

Давлат раҳбарининг сўзларидан келтирилган иқтибосларни ўқиб чиқиш тавсияси мулозимларга етказилгани хабар РБК нашри томонидан келтирилди. Ўтган ҳафта бошида 50 нафар депутат, Федерация Кенгаши ва Жамоатчилик палатаси аъзолари иштирокида Кремлда ўтган учрашувда маъмурият раҳбарининг биринчи ўринбосари Вячеслав Володин барчага китобни ўқиб чиқишни қатъий тавсия қилган.

“Володин китоб ҳақида гапирди. Унинг фикрича, у ҳар бир сиёсатчининг столи устида турадиган севимли китобига айланиши лозим”, - деди нашрнинг суҳбатдоши.