Россиянинг собиқ молия вазири, фуқаролик ташаббуслари қўмитаси раҳбари Алексей Кудрин Россиянинг Туркияга қарши санкцияларига салбий муносабат билдирди.
“Россия санкцияларга нисбатан позициясини ўзгартирди. Менинг бу борадаги фикрим эса ўзгармади: мен иқтисодий санкцияларга салбий муносабатдаман – ҳам Россияга қарши, ҳам Туркияга қарши жорий қилинганларига”, - унинг сўзларини келтиради Интерфакс агентлиги.

Кудриннинг фикрича, Су-24 ҳалокатидан сўнг Анқарага қарши сиёсий демаршлар уюштириш билан чекланиш лозим эди. Иқтисодий чекловлар эса биринчи навбатда Россия бизнесига зарар келтирмоқда: саноат учун зарур бутловчи қисмлар етиб келмаяпти, малакали ишчилар кетиб қолмоқда.

Кудриннинг таъкидлашича, қоидаларнинг ўзгартирилиши ҳар доим иқтисодиёт институтларига зарар келтиради.
“Институтлар бугуннинг иқтисодиётидаги энг муҳим нарсадир. Бугун мамлакатлар етказилган картошка ёки ишлаб чиқарилган электрон чиплар миқдорига кўра пойга ўйнамайди, балки ҳар доим ишлаб чиқаришни янгиловчи ва ташкил этувчи институтлар яратиш билан шуғулланади. Йирик давлатлар, қўшнилар билан очиқ ҳамкорлик ҳар доим мамлакат ўсишининг қўшимча омили бўлади”, - хулоса қилди мутахассис.