Буюк Британия шаҳзодаси шаҳзода Чарльз атом бомбасидан фойдаланиш ҳуқуқига эга шахс ҳисобланади. Бу ҳақда Буюк Британиядаги Плимут университети ходими тадқиқотларига асосланиб The Independent нашри хабар тарқатган.

Фан номзоди бўлмиш Жон Киркхоуп ўз қўли остидаги ҳужжатларни ўрганиш орқали шаҳзода Чарльз Корнуолл герцоги мақомидан фойдаланган ҳолда бир қатор қонунлар доирасидан ташқарида туришини аниқлаган.

Ўтказилган тадқиқотга кўра, Корнуолл герцоги унвони Чарльзни қатор қонунлар бўйича жазоланишдан озод қилади, улар орасида «Ядровий портлаш тўғрисидаги акт», «Маълумотлар ҳимояси тўғрисида»ги қонун бор.

«Ядровий портлаш тўғрисидаги акт» тинч вақтда ядро бомбасини ҳаракатга келтирганлик учун бир умрлик қамоқ кўринишидаги жазони кўзда тутади, бироқ у шаҳзода Чарльз учун амал қилмайди.

Бундан олдинроқ, Буюк Британия бош вазири Дэвид Кэмерон агар талаб этилса, британияликлар ядро қуролидан фойдаланишга тайёрлигини маълум қилганди.