Ўзбекистон Ташқи ишлар вазирлигида Ўзбекистон Республикасининг халқаро шартномаларини сақлаш учун замонавий депозитарий яратиш бўйича олиб борилган ишлар якунланди.

Ҳужжатларни узоқ муддат ва эҳтиёткорона сақлаш мақсадида энг янги технологиялар билан жиҳозланган депозитарий хонасида оптимал микроиқлим таъминланмоқда. Ёнғин хавфсизлигига алоҳида эътибор қаратилган.

Халқаро тажрибани инобатга олган ҳолда танланган сақлаш усули “Ўзбекистон Республикасининг халқаро шартномалари тўғрисида”ги Қонунига мувофиқ Ташқи ишлар вазирлигига сақлаш учун топширилган 4 мингга яқин ҳужжатларнинг ҳар биридан тезкорлик билан фойдалана олиш имконини яратади. Бажарилган ишлар БМТ Тараққиёт дастури техник кўмаги ёрдамида амалга оширилган.

Бир вақтнинг ўзида Ўзбекистон Республикаси Адлия вазирлиги билан биргаликда Ўзбекистон Республикаси Қонун ҳужжатлари маълумотлари миллий базасининг (lex.uz) мамлакатимиз халқаро шартномаларига тегишли қисми такомиллаштирилмоқда. Ҳозирги пайтга келиб 1991-2015 йилларда тузилган 1200га яқин Ўзбекистон халқаро шартномалари веб-сайтда жойлаштирилди.