13 ноябрда Париждаги “Стад де Франс” стадионида терактлар давомида ўзини портлатиб юборган террорчи-худкушнинг онаси ўғлининг теракти оқибатида қурбонлар бўлмаганидан “фахрланишини” айтди. Бу ҳақда Associated Press ахборот агентлиги аёлнинг Maghreb TV телеканали эфирида айтган сўзларига иқтибос келтирган ҳолда хабар бермоқда.

Бельгияда яшовчи, ўзини Фотима Хадфий деб таништирган аёлнинг айтишича, у ўз ўғлининг террорчи бўлганидан ўғли унга Суриядан қўнғироқ қилмагунча бехабар бўлган. Бунгача аёл ўғлини Марокашдаги яқинларининг ёнига кетган деб ўйлаган.

Бундан кейин, 2015 йил бошида аёлнинг уйига Бельгия полицияси тинтув қилгани келган, бироқ Билол Хадфий қариндошларининг террорчилар билан алоқаси борлиги аниқланмаган.

Билол Хадфий 13 ноябрда ўзини Париждаги терактлар пайтида портлатиб юборган ва бунинг оқибатида ундан бошқа қурбонлар бўлмаган.

Аёлнинг айтишича, унинг ўғли Бельгияда таҳқирланган ва айнан шу ҳолатдан террорчилар уни ёллашда фойдаланишган. Аёл ўғли радикал исломга қўшилганидан бехабар бўлган ва дастлаб у ўғлининг спиртли ичимликлар ва марихуана истеъмол қилмай қўйганидан хурсанд бўлиб юрган, бироқ кейин Билол уйини тарк этиб, террорчилар сафига қўшилган.

Ноябрда Парижда амалга оширилган бир қатор терактларда 130 киши ҳалок бўлганди.