Украина ишлаб чиқарувчилари Россия бозорининг санкциялар туфайли ёпиб қўйилгани муносабати билан янги экспорт майдончаларини қидирмоқда. Бунда биринчи навбатда Осиё ва Африка давлатларига катта умид боғланмоқда. Украина иқтисодий ривожланиш ва савдо вазири ўринбосари Наталья Микольская “Общественное ТВ” каналига берган интервьюсида бу ҳақда маълумот берди.

“Охирги уч йил ичида маҳаллий маҳсулотнинг Россияга экспорти деярли 4 мартага қисқарди – 2012 йилдаги 17.3 млрд доллардан 2015 йилда 4 млрд долларга тушиб кетди”, - деди мамлакатнинг савдо вакили.
Микольская Россия бозорининг ёпилиши Украина экспортчилари учун фожиага айланмаслигини таъкидлаб ўтди.

“Кейинги йилда Украина мамлакат учун энг манфаатли бўлган шериклар: Хитой, Туркия, Африка ва Яқин Шарқ давлатлари билан ҳамкорликни фаоллаштиришни режалаштирмоқда”, - дея хулоса қилди Микольская.