Россиялик миллиардер, USM Holdings асосчиси Алишер Усмонов “Россия 24” телеканалига берган интервьюсида ўзининг инвестицион режалари ҳақида сўзлаб берди. Унинг айтишича, у Хитойга киритаётган сармояларини камайтирмайди ва шу билан бирга Ҳиндистон активларига инвестиция ҳажмини оширади. 

“Бизнинг Хитой активларига инвестицияларимизни шартли равишда стратегик ва молиявийга бўлиш мумкин. Мисол учун, биз смартфон ишлаб чиқарувчи Xiaomi компанияси яратилаётганда унга катта инвестициялар қилганмиз. Ҳозирда бу компания Хитойда 1-рақамли ишлаб чиқарувчи ҳисобланади. Яна битта компания – JD.com савдо интернет-майдони. Биз бу компанияга ҳам жиддий инвестициялар қилганмиз. Улар бир неча баробарга кўпайди. Мана шулар бизнинг стратегик инвестицияларимиздир”, деб айтмоқда Усмонов.

Тадбиркор хитой ва ҳинд инвестицияларининг муваффақиятига ишонишини айтди.

“Alibaba интернет-ритейлер бу молиявий инвестициядир, чунки биз бу компаниядан катта даражада чиққанмиз. Биз дастлабки сармояларимизни 5-6 марта кўпайтириб олдик. Шу билан бирга биз ҳинд бозорига синов инвестицияларини киритмоқдамиз. Биз бу бозор ва иқтисодиётларнинг ўсишига ишонамиз. Ишончим комилки, бу лойиҳаларимизда бизни  муваффақият кутмоқда”, деб қўшимча қилди Усмонов.