28 декабрь куни Янги йил байрами арафасида “Ўзбекистон Республика товар-хомашё биржаси” АЖда 2015 йилнинг давлат ва корпоратив харидларда энг яхши брокерлик идоралари ҳамда товар етказиб берувчиларини турли номинациялар бўйича тантанали тақдирлаш маросими бўлиб ўтди.
”ЎзРТХБ”АЖ матбуот хизматининг хабар қилишича, тадбирда 10 брокерлик идорасининг биржа фаолиятини ривожлантиришдаги фаол иштироки алоҳида қайд этилди. Жумладан, Фарғона вилоятидаги– БК №8561, Наманган вилоятидаги– БК №9103, Андижон вилоятидаги– БК №10062, шунингдек, Тошкент шаҳри ва Тошкент вилоятларидаги – БК №709, №455 брокерлик идоралари «Биржа савдолари соҳасидаги хизматлари учун» мукофотлари билан тақдирланди. Уларнинг фаол иштироклари боис биржа савдолари янги турдаги товарлар билан бойитилди.
2015 йил якунларига кўра ярмарка савдолари тизимида энг юқори баҳода битимлар тузишга эришганликлари учун Қашқадарё вилоятидаги – БК №4045, №4111, Тошкент шаҳри ва Тошкент вилоятидаги – БК №427, №475, №2 брокерлик идоралари «Онлайн савдоларини ривожлантиришда эришган ютуқлари учун» мукофотландилар.
Тантананинг асосини тадбиркорларга «2015 йилнинг энг яхши маҳсулот етказиб берувчиси» номинацияси бўйича мукофотларни топшириш маросими ташкил этди. Ушбу йўналишда беш нафар таъминотчилар, яъни «Ёкубжон Суннат ўғли» МЧЖ, «Эталон Сангзор» ҚК, «Technogen» МЧЖ, «Stand trade» ва «Power Max Group» МЧЖлари мукофотга лойиқ деб топилдилар. Йил давомида ушбу корхоналар давлат ва корпоратив харидлар бўйича аукцион савдоларида фаол иштирок этиб, тузилган битимлар юзасидан ўз мажбуриятларини сифатли ва вақтида бажарганликлари алоҳида таъкидланди.