Ўзбекистон миллий матбуот марказида “Маҳалла” хайрия жамоат фонди республика бошқаруви томонидан “Кексаларни эъзозлаш йили” Давлат дастури ижроси бўйича амалга оширилган ишлар ва эришилган натижалар” мавзусида матбуот анжумани ташкил этилди.

Анжуманда якунига етаётган “Кексаларни эъзозлаш йили”да “Маҳалла” хайрия жамоат фонди томонидан олиб борилган ишлар тўғрисида маълумотлар тақдим этилди. Таъкидланишича, 2015 йилда айниқса, кексаларни эъзозлаш, уларни ижтимоий ҳимоя қилиш, саломатликларини тиклаш, маҳаллаларга зарур шарт-шароитларни яратиб бериш каби йўналишларга алоҳида эътибор қаратилди.

Матбуот анжуманида қайд этилганидек, “Кексаларни эъзозлаш йили” Давлат дастури доирасида Фонд ҳисобидан 10 миллиард сўмдан зиёд маблағ сарфлангани бу борадаги ишларнинг кўлами нақадар кенг эканлигидан далолат беради.

Хусусан, мазкур маблағлар ҳисобидан “Маҳалла” фонди томонидан маҳаллаларда “Кексаларни эъзозлаш йили” Давлат дастури тарғиботи бўйича 65 мингдан ортиқ маънавий-маърифий тадбирлар ташкил этилгани, уруш ва меҳнат фронти фахрийларининг ижтимоий-маиший шароитларини яхшилаш, уларнинг фаровонлиги ва муносиб турмушини таъминлаш мақсадида 540 нафарига телевизорлар олиб берилгани, шунингдек, ёлғиз ва ижтимоий муҳтож 3 минг нафардан ортиқ кексаларнинг уй-жойлари таъмирлангани алоҳида эътироф этилди.

Шунингдек, “Саховат” ва “Мурувват” уйларида яшовчи 6 минг нафардан ортиқ кексаларга 541,2 млн. сўмлик кийим-кечак маҳсулотлари олиб берилди, 30 минг нафардан ортиқ уруш қатнашчиларини, қолаверса, ёлғиз пенсионерларни махсус дори-дармонлар билан бепул таъминланишига кўмаклашилди.