Испаниянинг "Барселона" клуби раҳбарияти аргентиналик ҳужумчиси Лионель Мессини Англиянинг "Манчестер Сити" жамосига 160 млн евро эвазига сотишга рози бўлган. Бу ҳақда The Sun таблоиди хабар тарқатган.

Манбанинг ёзишича, инглизлар бу ҳужумчини қишки трансферлар вақтидаёқ харид қилиш учун таклиф жўнатишган. Агар бу трансфер амалга ошадиган бўлса, "Манчестер Сити" футбол тарихидаги энг йирик трансферга қўл урган бўлади. Айни вақтда бу борадаги рекорд "Реал"нинг "Тоттенҳэм"дан Гарет Бейлни 100 млн еврога харид қилиши бўлиб турибди.

"Манчестер Сити" раҳбарияти Мессига ҳафтасига 1 млн евро миқдорида маош беришга тайёрлигини билдирган.

Нашрнинг ёзишича, каталонияликлар Мессини сотишга тайёр. Қайд этиш керакки, Месси жорий мавсумнинг биринчи ярмини жароҳат туфайли ўтказиб юборди. Унинг йўқлигини жамоанинг бошқа ҳужумчилари Неймар ва Суарес билдиришмади. Айни вақтда "Барселона" Ла-лига турнир жадвалида биринчи ўринни эгаллаб турибди.

Жамоа раҳбарияти Мессини молиявий муаммоларни ҳал қилиш учун сотишга қарор қилгани айтилган.

Маълумот учун, айни вақтда 28 ёшга чиққан Лионель Месси каталонияликлар жамоасининг футбол академияси тарбияланувчиси ҳисобланади. У илк марта жамоанинг асосий таркибида 17 ёшида кўриниш берган. У "Барселона" тарихидаги энг кучли ҳужумчи сифатида тан олинган. Месси олган "Олтин тўп" мукофотлари сони бўйича ҳам тенгсиз. У 2009 йилдан 2012 йилгача бўлган муддатда 4 марта дунёнинг энг яхши футболчиси сифатида тан олинган. У шунингдек, 2009, 2011 ва 2015 йилларда УЕФА версиясига кўра Европанинг энг яхши футболчиси сифатида мукофотланган.

«Манчестер Сити» Мессига йилига 27 млн евро маош тўлашга тайёрлигини билдирди