Қирғизистоннинг Тўқмоқ шаҳрида гувоҳлар жиноятчилар томонидан юкхонада олиб кетилаётган киракашни қутқариб қолишди. Бу ҳақда Чу вилояти ИИББ матбуот хизмати хабар қилди.

Айтилишича, тиббий ниқоблар тақиб олган икки шахс Бишкекда 28 декабрь кечаси Honda ҳайдаб кетаётган киракашдан уларни Катта Чу каналига элтиб қўйишни сўраган. Бироз йўл юргач, улардан бири киракашни бўға бошлаган, сўнг иккалалашиб эркакни юкхонага солишган. Шундан сўнг жиноятчилар Тўқмоқ шаҳрига йўл олишган.
Кант шаҳри яқинида Honda ёнидан ўтаётган бошқа ҳайдовчилар кимдир юкхона ичидан қўл силкитаётганини кўришган. Киракаш бир амаллаб юкхона эшигини очган, унинг юзи қонга ботганини кўрган гувоҳлар дарҳол ёрдамга ошиқишган. Ҳайдовчилар Honda’ни қувиб ўтиб, унинг йўлини тўсишган. Киракаш машинадан сакраб тушишга улгурган. Жиноятчилар эса машинани номаълум томонга олиб қочиб кетишган.

Кемине шаҳрида ИИВ ходимлари айтилган машинани аниқлашган ва унинг кетидан қувишган. Бишкек-Тўруғарт трассасида машинани ҳайдаб кетаётган жиноятчи бошқарувни қўлдан чиқарган, натижада автоулов ағдарилиб кетган.

Қўлга олинган 1996 ва 1997 йилларда туғилган жиноятчилар Қорақўл шаҳридан эканлиги аниқланган. Улардан бири автоҳалокат жойида оламдан ўтган, иккинчиси эса шаҳарнинг реанимация бўлимига олиб келинган.