29 декабрь куни Тошкентдаги «Версаль» ресторанида 24-миллий чемпионат якунларига кўра чемпионлик шоҳсупасига кўтарилган 11 карра Ўзбекистон чемпиони «Пахтакор» жамоасини расмий тақдирлаш маросими ҳамда Янги йил базми ташкил этилди. Бу ҳақда «Оламспорт» хабар берди.

Жамоа аъзоларига олтин медалларни Ўзбекистон Профессионал футбол лигаси бош директори Фарҳод Магометов топширган.

Шундан сўнг, алоҳида номинациялар бўйича футболчиларга эсдалик совғалари топширилган.

Ярим ҳимоячи Шерзод Каримовнинг «Локомотив» дарвозасига урган голи мавсумнинг энг чиройли голи деб топилди.

Чемпионат тўпурари бўлган Игорь Сергеев эса «Пахтакор»нинг 2015 йилдаги энг яхши футболчиси бўлди.

Игорь Сергеев бу йилги мавсумда жами 50та учрашувда майдонга тушиб, рақиблар дарвозасини 34 маротаба ишғол қилди. Унга клуб раҳбарияти томонидан совға сифатида автомобиль калити топширилди.

Бундан ташқари, маросимда йил давомида «Пахтакор» жамоаси фаолиятини ёритиб борган оммавий ахборот воситалари ходимларидан бир гуруҳига фахрий ёрлиқлар топширилди.

Эслатиб ўтамиз, «Пахтакор» Олий лиганинг 2015 йилги мавсумида чемпионликни охирги турда қўлга киритганди.