Футбол бўйича Ўзбекистон олимпия терма жамоаси бош мураббийи Самвел Бабаян январь ойида Қатарда бўлиб ўтадиган 23 ёшгача бўлган футболчилар ўртасидаги Осиё чемпионатига борадиган якуний таркибни эълон қилди. Бу ҳақда Ўзбекистон Футбол Федерацияси матбуот хизмати хабар берган.

Тошкент ва Дубайда ташкил этилган икки босқичли йиғин давомида Самвел Бабаян бошчилигидаги мураббийлар штаби бир қанча номзодлар орасидан 23 нафар футболчини саралаб олди.

Улар орасида Ўзбекистон миллий терма жамоасининг аъзолари — Жавоҳир Соҳибов, Достонбек Ҳамдамов, Жамшид Искандеров, Икром Алибоев, Элдор Шомуродов ва Игорь Сергеев каби футболчилар бор.

Таркиб асосан Ўзбекистон миллий чемпионатида ўйнайдиган футболчилар ҳисобига қурилган бўлиб, Сербиянинг «Явор» клуби футболчиси Хусниддин Ғофуров терма жамоадаги ягона легионер ҳисобланади.

Ўзбекистон олимпия терма жамоаси 2016 йилнинг 2 январь куни навбатдаги йиғинда иштирок этиш учун Дубайга жўнаб кетади. Йиғин тугагач, делегация Қатарга йўл олади.

Ўзбекистон олимпия терма жамоасининг Осиё чемпионатида иштирок этадиган таркиби:

Дарвозабонлар — Абдумавлон Абдулжалилов («Нефтчи»), Жавоҳир Илёсов («Машъал»), Асилбек Омонов («Қўқон-1912»);

Ҳимоячилар — Сардор Раҳмонов («Нефтчи»), Абдуллоҳ Олимов («Пахтакор»), Максимилиан Фомин («Бухоро»), Жавлон Мирабдуллаев («Металлург»), Муҳсинжон Убайдуллаев («Пахтакор»), Акромжон Комилов («Бунёдкор»), Достон Турсунов («Нефтчи»), Жамшид Болтабоев («Пахтакор»), Владимир Козак («Пахтакор»);

Ярим ҳимоячилар — Жавоҳир Соҳибов («Пахтакор»), Отабек Шукуров («Бунёдкор»), Достон Ҳамдамов («Бунёдкор»), Жалолиддин Машарипов («Пахтакор»), Темур Ҳакимов («Оқтепа»), Жамшид Искандеров («Пахтакор»), Икромжон Алибоев («Локомотив»), Ҳусниддин Ғофуров («Явор», Сербия);

Ҳужумчилар — Игорь Сергеев («Пахтакор»), Элдор Шомуродов («Бунёдкор»), Жасурбек Ҳакимов («Сўғдиёна»).

Маълумот учун, Ўзбекистон терма жамоаси 12 январда старт оладиган Осиё чемпионатида Ироқ, Жанубий Корея ва Яман терма жамоалари билан бирга «C» гуруҳида жой эгаллаган. Ўзбекистонлик олимпиячилар дастлабки учрашувни 13 январда Жанубий Кореяга қарши ўтказади. Сўнгра 16 январда Ироқ билан, 19 январда эса Яман билан ўйнайди.

Ушбу Осиё чемпионати 2016 йили Бразилиянинг Рио-де-Жанейро шаҳрида ташкил этиладиган ёзги Олимпиадага йўлланма берувчи мусобақа бўлиб, уч жамоа — чемпионатнинг икки финалчиси ва 3-ўрин учун учрашув ғолиби Олимпия ўйинлари йўлланмасини қўлга киритади.