Жанубий Қозоғистон вилоятида 17 ёшли қиз ўзининг ўғирланишини саҳналаштирди. Унинг бу ҳаракатидан мақсади ўзининг озод этилиши учун отасидан пул ундириш бўлган.

Маълум қилинишича, 27 декабрь куни 40 ёшли шахс вилоятнинг Сариагаш туманидаги ИИБнинг 1-рақамли полиция бўлимига мурожаат қилган.

У 1 кун олдин вояга етмаган қизи бозорга кетгач, уйга қайтмагани ҳақида маълум қилган. Кўп ўтмасдан унга номаълум шахс қўнғироқ қилиб, қизининг озод этилиши учун пул талаб қилган.

Полициячилар "Одам ўғирланиши" моддаси бўйича жиноий иш очиб, текширув ишларини бошлашган.

Тезкор қидирув амалиёти натижасида ўғирланган қизнинг жойлашган ўрни аниқланди. Полициячилар уни Чимкентдаги уйларнинг биридан топишган.

Аниқланишича, бу вазиятда ҳеч қандай одам ўғирлаш ҳодисаси юз бермаган, қизнинг ўзи одамларни ўзини ўғирлаш учун ёллаган. У интернет орқали танишгани бир ёш йигитнинг олдига келиб, ўзининг телефонини унга берган ва отасига қўнғироқ қилиб, ундан пул талаб қилиш ҳақида кўрсатма қилган. У ҳеч қаерда ўқимаслиги ва ишламаслиги маълум бўлган. У бундан олдин ҳам бир марта уйдан қочиб кетгани маълум бўлган.

Айни вақтда полициячилар ҳодисанинг тўлиқ тафсилотларини ўрганишмоқда.