Туркия полициячилари Истанбулнинг Ўртакўй туманидаги денгиз қирғоғидан 4 ёшли суриялик қочқин бола Метин Файсалнинг танасини топишди. Doğan агентлигининг маълум қилишича, унинг оиласи узоқ муддатдан буён қочқин сифатида Туркияда яшаб келган.

Полиция маълумотларига қараганда, бола 16 декабрь куни Эминоню туманида йўқолиб қолган. Унинг онаси жасадни таниди, аммо айни пайтда патологоанатомларнинг ўлим сабаблари юзасидан хулосаси тайёр эмас. Полиция тергов ишларини давом эттирмоқда.

Туркия ҳудудида Суриядан келган 2 млн қочқин яшашда давом этмоқда. Уларнинг айримлари Туркия орқали Грецияга ўтиб, у ердан Европанинг ички қисмларига кириб боришга уринмоқда, бунда қочқинлар одатда хатарли денгиз йўлини танламоқда.

Қайиқларнинг ортиқ даражада тўлиб кетгани, хавфсизлик қоидаларига риоя этилмаслиги, малакали денгизчиларнинг йўқлиги ва қутқарув воситаларининг мавжуд эмаслиги туфайли ўнлаб қочқинлар чўкиб кетмоқда.