Ер юзи аҳолиси 2016 йилнинг 1 январь кунида деярли 7,3 млрд нафарни ташкил этади. Бу ҳақда АҚШ Аҳолини рўйхатга олиш бюроси маълум қилган.

Прогнозда айтилишича, 1 январь ҳолатига кўра Ер юзидаги кишилар сони 7 млрд 295 млн 889 минг 256 кишини ташкил этади. Бу 1 йил олдингида 78 миллионга кўп бўлади ва 1,08 фоизлик ўсиш кўрсаткичи қайд этилади.

Энг кўп аҳолига эга давлатлар Хитой ва Ҳиндистон бўлиб қолмоқда. Хитойда 1,367 млрд, Ҳиндистонда эса 1,252 млрд киши яшамоқда. Кейинги ўринларда АҚШ, Индонезия, Бразилия, Покистон, Нигерия, Бангладеш, Россия ва Япония жойлашган.

АҚШда аҳоли сони янги йилнинг биринчи кунида 322 млн 762 минг кишига етиши кутилмоқда. Бу 1 йилда 0,77 фоизлик ўсиш эвазига (2,47 млн) рўй беради. АҚШ аҳолиси 2010 йилдан буён 14 млн кишига кўпайган.

Рўйхатда тўққизинчи бўлиб турган Россия аҳолиси эса 142 млн 423 минг кишига тенг.

Бундан олдинроқ, БМТ ва Вашингтон университети мутахассислари Ер юзи аҳолиси 2100 йилга бориб 12,3 миллиардга етиши мумкинлигини айтишганди.