Кўплаб экспертларнинг фикрича, тарихда аралаш яккакурашнинг энг яхши жангчиси, россиялик Фёдор Емельяненко 31 декабрда рингга қайтади. Афсонавий спортчи Японияда улғайган, ҳинд миллатига мансуб жангчи Жайдип Сингх билан рингга тушади. Сингхнинг ҳисобида кикбоксинг қоидалари бўйича 51 та жангдан 40 та ғалаба ва MMA қоидалари бўйича 2 та жангдан 2 та ғалаба бор.

Аралаш яккакурашнинг номдор устаси, самбо бўйича бир неча карра жаҳон чемпиони, Японияда “Охирги император” деб аталувчи Фёдор Емельяненко ўз жангини йирик халқаро мусобақа Rizin Fighting World Grand Prix доирасида ўтказади. Бу мусобақа 29-31 декабрь кунлари Сайтама шаҳрида бўлиб ўтмоқда. Мусобақада 100 кг гача вазн тоифасига эга 8 нафар махсус танлаб олинган жангчилар беллашади. 

Сингх россиялик спортчидан 12 см га банландроқ ва 11 йилга ёшроқ. Маълум қилинишича, Емельяненко — Сингх жанги Токио вақти билан 11:05 да бошланиши керак (Тошкент билан Токио орасидаги фарқ 4 соатни ташкил қилади, яъни бу жанг Тошкентда соат 15:05 бўлганида бошланади).

Емельяненко ММА’да ўтказган 40 та жангидан 35 тасида ғалаба қозонган. У охирги жангини 2012 йил июнда ўтказган. Емельяненко  фаолиятини тугатгандан кейин Россия спорт вазири Виталий Мутконинг маслаҳатчиси бўлиб ишлаган ва “Россия ММА иттифоқи”нинг президенти ҳисобланади.

Жангга тайёрланиш давомида Фёдор Москва, Амстердам ва Старий Осколда (Россиянинг Белгород вилоятидаги шаҳар, Емельяненконинг она шаҳри) машғулотлар ўтказди.

Аввалроқ спортчи эски жароҳатларини даволаб, ўзини яхши ҳис қилаётгани ва рингга қайтиш вақти келганини айтганди.