Германиянинг Frankfurter Allgemeine Zeitung газетаси 2015 йилда “ғолиб” ва “мағлуб” бўлган сиёсатчилар рўйхатини тузиб чиқди, деб хабар бермоқда РИА “Новости” ахборот агентлигига иқтибос келтирган ҳолда vesti.ru сайти.

Нашр ғолиблар қаторига Россия президенти Владимир Путинни киритди. “Россия Эрон ядровий дастури бўйича музокараларда ўзини конструктив томондан кўрсатди, Россиянинг Сурия ихтилофига аралашуви эса бу масалани Путинсиз тартибга солишнинг иложи йўқлигига олиб келди. Бежизга Германия ташқи ишлар вазири Штайнмайер Россиянинг G8 га (катта саккизталик – таҳр.) қайтиши мумкинлиги ҳақида гапира бошламаган”, деб ёзмоқда газета.      

2015 йил АҚШ президенти Барак Обама ва Туркия президенти Ражаб Тойиб Эрдўған  учун ҳам муваффақиятли бўлди, деб ҳисоблашмоқда газета журналистлари. Эрдўғаннинг партияси парламентда кўпчилик ўрин олди, Европа Иттифоқи эса муҳожирлар билан боғлиқ муаммони ҳал қилишда Эрдўғанга эҳтиёж сезмоқда. “Фақатгина Туркия Сурия чегарасида Россия ҳарбий самолётини уриб тушириб, Россия билан муносабатларига путур етказгани катта хато бўлди”, дейилмоқда мақолада.   

Яна бир йирик сиёсатчи Ангела Меркель борасида эса, 2015 йил эҳтимол унинг канцлерлиги давридаги энг оғир йил бўлди, бироқ шунга қарамай у Европанинг сўзсиз етакчиси мавқеини мустаҳкамлаб олди. Нашрнинг фикрича, миграция инқирози кейинроқ тарихчилар 2015 йилни “Меркель даври охирлашининг боши” деб тан олишлари мумкин бўлган вазиятга олиб келиши мумкин.

Йил ғолиблари орасига франциялик сиёсатчи аёл Марин Ле Пен ва АҚШлик миллиардер Дональд Трамп ҳам киритилди.

Газета Греция молия вазири Янис Варуфакис, Австралия бош вазири Тони Эбботт, Венесуэла президенти Николас Мадуро ва Аргентинанинг эндиликда собиқ президенти Кристина Киршнерни 2015 йилда мағлуб бўлган сиёсатчилар деб топди.