"Барселона" жамоаси ҳужумчиси Лионель Месси Испания чемпионатининг 17-турида "Бетис"га қарши кечган (4:0) ўйинда майдонга тушиш орқали каталонияликлар либосида 500-учрашувини ўтказди.

Аргентиналик ҳужумчи мазкур учрашувда рақиб дарвозасига урилган тўртта голнинг бирига муаллифлик қилиб, клуб сафида урилган голлари сонини 425тага етказди. Бундан ташқари, Месси 500 ўйин давомида 160 маротаба жамоадошларини голли пас билан таъминлаган.

Бу натижа орқали футболчи "Барселона" сафида 500талик маррани забт этган олтинчи футболчига айланди. Жамоада энг кўп ўтказган 5 футболчи қуйидагилар: Хави (767 ўйин), Карлес Пуйоль (593 ўйин), Андрес Иньеста (567 ўйин), Мигель (549 ўйин), Виктор Вальдес (535 ўйин).

Маълумот учун, Лионель Месси "Барселона" сафида 26 маротаба турли мусобақаларда ғолиб бўлган. Шунингдек, аргентиналик ҳужумчи 4 карра "Олтин тўп" соҳиби бўлган.