Ўтган ҳафта мобайнида Ўзбекистон ҳудудида 301та ёнғин қайд этилган. Бу ҳақда Ўзбекистон ИИВ матбуот хизмати хабар берган.

Турли сабабларга кўра содир бўлган ёнғинларда 4 нафар фуқаро тан жароҳатлари олишган ва 6 нафар фуқаро ҳалок бўлган. Ушбу ёнғинларда 804 млн сўмдан ортиқ қурилиш конструкциялари ва 989 млн сўмга яқин моддий бойликлар ёнғиндан сақлаб қолинган.

Андижон вилояти Андижон шаҳрида яшовчи фуқаро А.Азимовнинг уйида иситиш печи ёқилиб, назоратсиз қолдирилиши оқибатида ёнғин содир бўлиб, уйнинг 15 кв.м. майдонда уй жиҳозлари ёниб зарарланган. Ёнғинни ўчириш вақтида уй эгасининг 2 нафар фарзандининг куйган ҳолдаги жасадлари топилган ҳамда уй эгаси А.Азимов куйиш тан жароҳати олгани аниқланган.

Фарғона вилояти Тошлоқ туманида яшовчи фуқаро Ғ.Раимованинг уйида электр симларнинг қисқа туташуви натижасида ёнғин содир бўлиб, уйнинг 100 кв.м. майдонда том ва шифт қисми ёниб зарарланган.

Хоразм вилояти Урганч туманида яшовчи фуқаро Ж.Рахимовнинг уйида иситиш печининг дудбурони қизиб кетиши натижасида ёнғин содир бўлиб, уйнинг 100 кв.м. майдонда том қисми ва ғамлаб қўйилган хашаги ёниб зарарланган.

Ушбу ҳолатлар бепарволик ва эътиборсизлик туфайли содир бўлмоқда. Бундай ҳолатларга йўл қўймаслик учун ёнғин хавфсизлиги талабларини йоддан чиқармаслик тавсия этилади.