Канаданинг Serinus Energy компанияси Burisma компанияси билан боғланган Resano Trading Ltd компаниясига Украинадаги газ активларини сотмоқда. Бу ҳақда Serinus Energy берган хабарда айтилган.

Serinus компанияси KUB-Gas Holdings Limited’нинг 70 фоизлик акциялар пакетини сотмоқда. KUB-Gas компанияси Днепр-Донецк ҳавзасида газ конига эга.

Serinus ўз акциялар пакети учун 30 млн доллар олади. 13,5 млн долларлик биринчи транш компания ҳисобига ўтказиб берилган. Битимни 8 февралгача ёпиш режалаштирилмоқда.

Serinus активни сотишдан олган пулларни корпоратив қарзни узишга ва Руминиядаги бизнесни ривожлантиришга ишлатмоқчи.

Burisma компанияси 2010-2014 йилларда Украинанинг атроф-муҳитни муҳофаза қилиш ва табиий ресурлар вазири ҳамда Хавфсизлик кенгаши котиби ўринбосари лавозимларини эгаллаган украиналик тадбиркор Николай Злочевскийга тегишли.

Компания Украина ҳудудида нефть ва газ қазиб олиш учун 20 тага лицензияга эга. Burisma директорлар кенгашига АҚШ вице-президенти Жо Байденнинг ўғли Хантер Байден ҳамда 1995-2005 йилларда Польша президенти бўлган Александер Квасьневский киради.