Американинг Barrett-Jackson аукционида илк Acura NSX суперкари 1,2 миллион долларга сотилди. Бу 156 минг доллардан бошланадиган базавий купелардан қарийб 8 маротаба қимматдир.

Автомобилни Hendrick Motorsports компанияси асосчиси ва NASCAR пойга жамоаси эгаси, тижоратчи Рик Хендрик сотиб олган. Аввалроқ америкалик миллиардер Chevrolet Corvette Stingray (1,15 миллион доллар), Corvette Z06 (1 миллион доллар) ва BMW M5 «30 Jahre» (700 минг доллар) каби қимматбаҳо “тойчоқ”лар эгаси бўлганди.

Acura NSX 2017 купеси 3,5 литрли битурболашган мотор билан таъминланган. Турбомотордан ташқари машинани учта электродвигатель ҳаракатлантиради. Шундан иккитаси олд ўқни айлантиришга мўлжалланган. Acura NSX`да жами 573 от кучи бор.

Barrett-Jackson кимошди савдосида Acura NSX`дан ташқари Ford Focus RS`нинг дастлабки нусхаси ҳам сотилган. 550 минг долларга пулланган мазкур қимматбаҳо автомобиль савдосидан тушган маблағ болалар учун хайрияга сарфланади.