Алишер Навоий таваллудининг 575 йиллиги муносабати билан “Навоийни соғиниб”деб номланган адабий-бадиий кеча 2016 йил 5 февраль куни 15:00 да Сирдарё вилояти Гулистон шаҳридаги 1-сон болалар мусиқа ва санъат мактабида бўлиб ўтади. Бу ҳақда тадбир ташкилотчиси Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази матбуот хизмати хабар бермоқда.

Ушбу тадбир Сирдарё вилоят ҳокимлиги, Халқ таълими бошқармасининг амалий кўмаги ҳамда Республика халқ ижодиёти ва маданий-маърифий ишлар илмий методика маркази, Республика “Тасвирий ойина” ижодий уюшмасининг услубий ёрдамида ташкил этилмоқда.

Республика халқ ижодиёти ва маданий-маърифий ишлар илмий методик маркази фаолияти санъат ва уни ривожлантириш, янги истеъдод соҳибларини кашф этиш билан бевосита боғлиқдир. Шунинг учун марказ ходимлари вилоятлардаги мусиқа ва санъат мактаблари билан мустаҳкам алоқа ўрнатишга астойдил ҳаракат қилмоқда. Навоий даҳосига эҳтиром рамзи сифатида ўтказилаётган бугунги тадбирдан кўзланган асосий мақсад улуғ бобомизнинг бой адабий меросини ўрганиш ва тарғиб этишни кенг йўлга қўйиш, ўқувчи-ёшлар қалби ва онгига шоир асарларининг мазмун-моҳиятини, бадиий хусусиятини ва тарбиявий аҳамиятини чуқур сингдириш, шунингдек, замонавий ўқув даргоҳларида санъат сирларини ўрганаётган ёш санъат шайдолари билимини, истеъдодини кўрикдан ўтказиб, маънавий рағбатлантиришдан иборатдир.

Тадбирда Республика халқ ижодиёти ва маданий-маърифий ишлар илмий методика маркази қошида фаолият кўрсатаётган “Сурхон” эстрада ансамбли ҳамда “Сирдарё наволари” ашула ва рақс ансамбли ўз дастурлари билан иштирок этади.