Ўзбекистон Президентининг 2016 йил 26 январдаги қарорига мувофиқ, Аббосжон Мирзораҳимов маданият ва спорт ишлари вазири ўринбосари лавозимига тайинланди. Бу ҳақда вазирлик матбуот хизмати хабар берди.

Аббосжон Мирзораҳимов вазир ўринбосари лавозимига тайинланишидан аввал Маданият ва спорт ишлари вазирлиги Маданий-маърифий муассасалар, музейлар, ахборот ресурс марказлари бошқармаси бошлиғи лавозимида ишлаган.

У 1997—2001 йиллар Термиз давлат университети (бакалавр), 2001—2003 йиллар Ўзбекистон Миллий университети (магистр), 2006 йил Ўзбекистон Фанлар академияси Тарих институти (аспирантура), 2011—2012 йилларда Ўзбекистон Президенти ҳузуридаги Давлат ва жамият қурилиши академиясида таҳсил олган. Тарих фанлари номзоди.

Вазир ўринбосари лавозимида Аббосжон Мирзораҳимов Маънавий-маърифий муассасалар, музейлар ва ахборот-ресурс марказлари бошқармаси, Маданий мерос объектларини муҳофаза қилиш ва улардан фойдаланиш илмий-ишлаб чиқариш бош бошқармаси, Бадиий экспертиза бошқармаси, «Ўзбекмузей» республика жамғармаси, республика музейлари, «Мозийдан садо» журнали таҳририяти, кўзи ожизлар учун кутубхоналар ишини мувофиқлаштиради, уларда ишнинг самарали ташкил этилиши, меҳнат ва ижро интизомларига амал қилинишини назорат қилади.

«Ўйлаймизки, янги тайинланган вазир ўринбосари маънавий-маърифий муасассалар тизимининг барча бўғинлари фаолиятини янада такомиллаштириш, соҳани янада ривожлантиришда ижобий натижаларга эришишга муваффақ бўлади», — дейилади вазирлик матбуот хизмати ахборотида.