Россия президенти Владимир Путин қонунчиликка Россияда ахборот технологиялари компанияларига тенг ишлаш шароитларини таъминлайдиган ўзгартиришлар киритиш бўйича таклифларни тайёрлаш вазифасини топширди. Бу ҳақда Кремль сайтида маълум қилинди.

Вазифа Россиянинг Федерал алоқа агентлиги, иқтисодиёт ва ривожланиш вазирлиги, молия вазирлиги, Федерал солиқ хизмати, саноат ва савдо вазирлиги, коммуникация ва алоқа вазирлиги, тегишли бошқармалар ва Интернетни ривожлантириш институтига топширилди. Тегишли таклифлар 1 сентябргача тақдим қилиниши керак.

Президентнинг топшириғи, хусусан, Россия бозорида ўз хизматларини сотиш билан шуғулланувчи хорижий компаниялар учун қўшилган нархга солиқ киритишга ҳам тааллуқли. Бу солиқ Google ва Apple компанияларига ҳам татбиқ қилиниши мумкин.