Туркиянинг Эгей денгизи ва Ўрта Ер денгизи қирғоқларидаги 1300дан ортиқ меҳмонхона мамлакатда хавфсизлик шароитлари ёмонлашгани ва Россия билан муносабатлардаги совуш туфайли сотувга қўйилган. Бу ҳақда Zaman газетасида хабар берилган.

Бу меҳмонхоналарнинг умумий нархи 30 миллиард лирага баҳоланган (10 миллиард доллардан ортиқ). Бу меҳмонхоналарнинг жами сиғими - 153 минг ўриндан ошиқ. Сотувга қўйилган меҳмонхоналарнинг аксар қисми Антальяда, россияликлар бозори яқинида жойлашган. Уларнинг сони 410та ва бу меҳмонхоналарнинг чорак қисми беш юлдузли меҳмонхоналар ҳисобланади.

Нашрнинг қайд этишича, Туркияда сайёҳлик саноати инқироз ёқасига келиб қолди. Газетанинг ёзишича, меҳмонхоналарнинг сотувга қўйилишига иқтисодий вазият ёмонлашгани ортидан Европадан келувчи сайёҳлар оқими пасайгани ҳам сабаб ҳисобланади. Шунингдек, меҳмонхоналар эгалари банклардан қарздор бўлиб қолишган.