"Толибон" жангариси Буюк Британия қуролли кучларини судга берди. Бу ҳақда The Times нашри хабар берган.

"Толибон" қўмондонларидан бири, бир қатор терактлар ташкилотчиси сифатида гумон қилинувчи Сердар Муҳаммаднинг мурожаатида айтилишича, уни британиялик ҳарбийлар Афғонистонда 106 кун давомида ноқонуний тарзда ҳибсда тутиб туришган.

Халқаро ҳуқуқ нормаларига кўра, халқаро ҳуқуқ тартибот органлари террористик ҳужумларда иштирок этгани гумон қилинувчиларни узоғи билан 96 соат ичида тергов қилиши керак бўлади.

"Бу дегани жангарини бир неча соат ортиқроқ тутиб туриш мумкинмас, дегани. Бу эса жуда кулгили", дея вазиятга баҳо беради Буюк Британия Мудофаа вазирлиги вакили Пенни Мордаунт.

Қайд этилишича, Сердар Муҳаммад каби бошқа жангарилар ҳам қонундаги бу камчиликдан фойдаланишга уринишлари мумкин.

Бундан олдинроқ, "Толибон" жангарилари ўз номини БМТнинг Хавфсизлик кенгаши томонидан тузилган террорчилик ташкилотлари рўйхатидан ўчирилишини талаб қилганди.