29 январь куни Майамида (Флорида штати) яшовчи аёл Клаудиа Кастильо маҳаллий полиция зобити билан ўрин алмашди.

У трассада ўзини қувиб ўтган патруль машинасига рухсат берилган энг юқори тезликда ҳам ета олмаётганига ва иккинчи машинанинг тезлиги рухсат берилган меъёрдан баландлигига эътиборини қаратди.

Шундан сўнг у зобит билан "гаплашиб қўйиш"га қарор қилди ва кўп ўтмай уни қувиб етиб, уни йўл четига чиқиб тўхташга мажбур қилди. У машинасидан тушмаган ҳолда полициячини олдига чақирган.

"Мени худди жойимда қотиб турганимдек қувиб ўтдингиз. Мен тезликни соатига 130 километргача чиқардим... ва бари бир чангингизда қолиб кетдим", деган Клаудиа бу "учар зобит"га.

Аёл зобитдан "қаерга бунчалик ошиқаётгани" ҳақида сўраган.

Бунга жавобан полициячи "ишга кетаётгани, тезликни ошириб юборганини сезмаганини" билдирган.

Кастильо хоним полициячилар фуқароларга ўрнак бўлиши лозимлигини эслатган, зобит эса унинг гапларини хотиржамлик билан қабул қилган.

Бу жараённи аёл видеога олган ва YouTube порталига жойлаштирган. Учта ролик жами бир миллион мартадан зиёд кўрилган. Видеолар машҳурлашиб кетгач, зобитнинг шахси аниқланган ва унга нисбатан текширув бошланган.