Еврокомиссия Европада терроризмни молиялаштиришни бартараф этиш бўйича чоралар доирасида Евроиттифоқда 500 евролик купюраларнинг катта миқдори сабабли тергов бошлаш арафасида. Бу ҳақда Financial Times хабар қилди.

Айни пайтда ЕИдаги кўплаб дўкон ва савдо марказларида 500 евролик купюраларни олишдан бош тортишмоқда. Евроҳудудда бундай купюраларнинг умумий миқдори эса жами евроларнинг тўртдан бир қисмини ташкил этади. Экспертлар фикрича, шунинг ўзи ҳам ҳаддан зиёд кўп саналади.

“Мазкур банкноталар ўзининг юқори қиймати ва катта бўлмаган ҳажми билан криминал доиралар ўртасида кенг фойдаланилади. 500 евролик энг юқори номиналли банкноталар ҳуқуқни муҳофаза қилиш органлари эътиборини ўзига тортган муаммо саналади”, - дейилади терроризмнинг молиялаштирилиши ва пул маблағларининг “ювилиши”га қарши кураш бўйича чора-тадбирлар режаси матнида.

Муаммони ҳал этиш учун Еврокомиссия Европол ва Европа Кенгашининг миллий полиция маҳкамалари билан ҳамкорликда иш олиб боради. Бундан ташқари, криминал ва террористик доираларда катта номиналдаги купюралар билан мулоқот қилиш даражасини камайтириш бўйича ҳам керакли чоралар қўлланилади.  Қайд этилишича, ҳозирча Европа марказий банки 500 евролик купюралар айланишини чеклаш бўйича ҳеч қандай қарор қабул қилгани йўқ.