Ibis меҳмонхоналар тармоғининг Ҳиндистоннинг Ченнай шаҳридаги янги Chennai City Centre меҳмонхонаси ўз мижозларига меҳмонхонада яшаш учун тўланадиган ҳақ миқдорини ўзлари белгилашларига рухсат берди. Бу ҳақда Business Traveller хабар бермоқда. Бу акция Pay What You Want (Қанча истасангиз шунча тўланг") деб номланган.

Мижозлар уч юлдузли меҳмонхонани тарк этаётганларида у ердаги хизмат кўрсатиш ва қулайлик даражасини баҳолаб, унга мос ҳақ қолдиришади. Акция меҳмонхонада 1 февралдан 29 февралгача бўлган даврда бир кунга қоладиган сайёҳларга татбиқ қилинади.

Ibis Chennai City Centre меҳмонхонасида 155 та хона мавжуд бўлиб, унинг ҳудудида теннис корти, гольф майдончаси, тренажёр зали бор.

AccorHotels компаниясига тегишли Ibis меҳмонхоналар халқаро тармоғи 1967 йилда ташкил этилган. Тармоқнинг биринчи меҳмонхонаси 1974 йилда Франциянинг Бордо шаҳрида очилган. Айни вақтда тармоқ дунё бўйлаб мингдан кўпроқ меҳмонхоналарга эга.