Номаълум шахс Москвадаги қамоқхонага ўнлаб телефонлар ҳамда қувватловчи қурилмалар солинган пакетни олиб киришга уринди. Бу ҳақда "Москва" янгиликлар сайти хабар тарқатган.

"Навбатчилик қисмига номаълум шахс қамоқхона девори устидан ошириб пакет отгани ҳақида хабар келиб тушди. Махсус гуруҳ воқеа жойини бориб текширганида ҳудуддан телефонлар солинган пакетни топган. Номаълум шахснинг ҳаракатлари кузатув камераларида қайд этилган", дейилади хабарда.

Маълум бўлишича, пакет ичидан 62та телефон, 35та қувватловчи қурилма, 24та сим-карта ва 3та USB-кабель аниқланган. Бу пакетни қамоқхона ичига улоқтирган шахс ҳали қўлга олинмаган.