Москва агар "Кулранг бўрилар" ("Бўзқуртлар") турк миллатчи ташкилоти Мисрда Россиянинг А321 самолёти фалокатига алоқадорлиги исботланса, Туркиядан авиафалокат қурбонлари яқинлари учун товон пули талаб қилиши мумкин. Бу ҳақда Россия Мудофаа ва хавфсизлик федерацияси кенгаши қўмитаси раиси Виктор Озеровга иқтибос келтирган ҳолда РИА “Новости” ахборот агентлиги хабар бермоқда. 

"Агар бу маълумот тасдиқланса, унда Россия ҳалок бўлган фуқаролари ва самолёт учун сўрайдиган товон пулини Туркиядан талаб қилиши мумкин", деб айтди Озеров.

Унинг айтишича, ҳозирча Россия ҳеч кимдан "расман товон пули талаб қилмаган".

"Бироқ қурбонлар яқинлари турли даъво аризаларини, хусусан Миср ҳукуматига, тайёрламоқдалар. Агар "Кулранг бўрилар" борасидаги маълумот тасдиқланса, унда даъво аризалари Туркияга йўлланади", деб айтмоқда Озеров.

Аввалроқ қурбонлар яқинлари Нью-Йорк судига мурожаат қилиш учун зарур бўлган ҳужжатларни расмийлаштириш билан шуғулланаётганлари маълум қилинганди.

Улар судга "Когалымавиа" авиакомпаниясига А321 самолётини берган АҚШнинг "International Lease Finance Corporation" лизинг компанияси устидан жамоавий даъво аризаси топширмоқчилар.