Ашхободда Туркманистон президенти Гурбангули Бердимуҳамедовнинг Paýhas çeşmesi (Донолик манбаи) номли китоби тақдим этилди. Бу ҳақда Turkmenistan.ru сайти хабар бермоқда.

Маросим Меросни асраш йилига бағишланган тадбирлар дастури доирасида ўтказилди.
“Тақдимот иштирокчилари ўз ичига туркман халқ мақоллари ва тез айтишларини олган “Донолик манбаи” китоби туркман халқининг бой маданий мероси ва миллий қадриятларини ўрганишда муҳим аҳамият касб этишини таъкидлаб ўтишди”, - дейилади хабарномада.

Бердимуҳамедовнинг янги китобидан ўрин олган мақол ва тез айтишлар бир қанча мавзувий гуруҳларга бўлинган бўлиб, туркман халқининг одоб-ахлоқи, фалсафаси, дунёқараши, инончларини акс эттиради.

Бу Туркманистон раҳбарининг биринчи ижодий ютуғи эмас. 2015 йил октябрида Мустақиллик кунига аталган концертда унинг сўзлари ва мусиқаси асосидаги “Олға! Фақат олға, жонажон Туркманистон!” қўшиғи янграган эди.