Франциянинг  Renault автоконцерни 2017-2022 йиллар учун мўлжалланган стратегик режасида Хитойга марказий ўрин ажратмоқчи, деб хабар бермоқда Renault-Nissan альянси раҳбари Карлос Гонга иқтибос келтирган ҳолда Economic Times нашри.

"Renault Хитойга тобе эмас, Хитой биз учун бир имконият. У кейинги стратегик режамизда марказий ўринни эгаллайди", деб айтди Гон 1 февралда Хитойнинг Ухань шаҳрида компаниянинг биринчи йиғув заводи очилиши маросимида.

Гон Renault Хитойда енгил автомобиллар ишлаб чиқаришга лицензияга эга эканлигини, айни вақтда йўлтанламаслар ишлаб чиқариш имкониятини кўриб чиқаётганини таъкидлаб ўтди.

Renault’нинг Хитойнинг Dongfeng Motor Group билан биргаликда яратган қўшма корхонаси раҳбари Жак Даниэлнинг маълумотларига кўра, 870 млн евролик заводнинг ишлаб чиқариш қуввати йилига 150 минг автомобилни ташкил қилади ва бу ҳажм 2-3 баробарга оширилиши мумкин.