2016 йил 3 февраль куни Ўзбекистон Республикаси меҳнат ва аҳолини ижтимоий муҳофаза қилиш вазирлиги томонидан ўтказилган “Меҳнат ва аҳолини ижтимоий муҳофаза қилиш вазирлиги томонидан 2015 йилда аҳолини ижтимоий муҳофаза қилиш, иш билан таъминлаш, ва меҳнат муҳофазаси борасида амалга оширилган ишлар тўғрисида” мавзусидаги матбуот анжуманида 2015 йил бандлик дастури ижроси ҳақида маълумот бериб ўтилди.

Вазирликнинг Бандликни таҳлил қилиш ва меҳнат бозорини тартибга солиш бошқармаси бошлиғи Эркин Авезов “Иш ўринлари ташкил ташкил этиш ва аҳолини бандлигини таъминлаш” дастурининг бажарилиши ва бандликнинг самарали шаклларини ривожлантириш масласига тўхталар экан ҳисобот даврида республика бўйича жами 990 мингдан ортиқ иш ўринлари ташкил этилиб, дастур 100,3 фоизга бажарилганини айтиб ўтди. Бунда, мақсадли дастурларга мувофиқ 262 мингта, жумладан саноатда – 116 мингта, хизмат кўрсатиш ва сервисда – 67 мингта, қишлоқ хўжалигида – 49 мингта иш жойлари ташкил этилди

Дастур ижросида асосий эътибор - кичик бизнесга қаратилган бўлиб, кичик корхона ва микрофирмалар, якка тадбиркорлик, уй меҳнати, деҳқон ва фермер хўжаликларида жами 728 мингдан зиёд кишининг бандлиги таъминланди (бу яратилган иш ўринларининг 74 фоизига тенг бўлди). Жорий йилнинг ўтган даврида 1208 дан ортиқ бўш иш ўринлари ярмаркалари ўтказилди ва уларда 53 мингдан ортиқ корхона ва ташкилотлар иштирок этиб, 62 минг кишига ишга жойлашиш бўйича йўлланмалар берилди. Шунингдек, ҳудудий меҳнат органларининг инспекторлари маҳаллаларда юриб, ишсиз бўлган ва иш қидираётган 284 мингга яқин фуқароларни ишга жойлашишига кўмаклашилди, улардан 90 минг нафари ижтимоий мухофазага мухтож ахолини ташкил этади.

Ишсизларнинг меҳнат бозоридаги рақобатга бардошлигини кучайтириш ва иш билан таъминлаш мақсадида 7,3 минг нафар ишсиз фуқаро иқтисодиётда талаб қилинаётган мутахассисликлар бўйича касбга тайёрланди ва қайта тайёрланди. Бундан ташқари, 1,5 минг нафар ишсиз “Усто-шогирд” усулида миллий ҳунармандчиликнинг турлари касблар бўйича ўқитилди ва ўргатилди.

Корхоналар билан ҳамкорликда 8 минг нафар ишсиз фуқаро ҳақ тўланадиган жамоат ишларига жалб этилди.