Суриядан Иорданияга келаётган катта сондаги қочқинлар мамлакат учун жиддий синов бўлмоқда. Иордания қироли Абдуллоҳ II ОАВларга берган интервьюсида қочқинлар билан вужудга келган вазият "қайнаш нуқтасига етмоқда" деб айтди.

"Яна озгина ва тўғон ёрилиб кетади", деб айтмоқда қирол.

Қиролнинг айтишича, суриялик қочқинлар мамлакат иқтисодиёти ва ижтимоий хизматлар учун жиддий синов бўлмоқда. "Давлат бюджетининг 25 фоизи қочқинларга ёрдам бериш учун сарфланмоқда, ижтимоий хизматлар имкониятлари чегарасида ишламоқда, ишсизлик кўпаймоқда. Бу вазият мамлакатнинг таълим ва соғлиқни сақлаш тизимига салбий таъсир кўрсатади", деб айтмоқда Абдуллоҳ II.

Қирол суриялик қочқинлар Иордания ичида ИШИД таъсирининг ўсишига сабаб бўлиши мумкинлигидан хавотирланмоқда ва шунинг учун чегараларнинг ўтказиш қобилиятини камайтириш керак, деб ҳисобламоқда.

"Бу ерда гап давлатнинг миллий хавфсизлиги ҳақида кетмоқда. Бу босқичда биз болалар ва тиббий ёрдамга муҳтож одамларни қабул қилишга афзаллик берамиз. Биз қочқинларни қабул қилишни давом эттираверамиз, бироқ чекланган миқдорда", деб айтди қирол.

Унинг фикрича, вазиятдан чиқишга 5 февралда Лондонда бўлиб ўтадиган қочқинлар муаммосига бағишланган Бешинчи халқаро анжуман ёрдам бериши керак. Қирол бу анжуманда Европа етакчилари билан қочқинлар муаммосини муҳокама қилишни режалаштирмоқда.