Жаҳонда ҳалол маҳсулотлар ва исломий хизматлари (ислом банкингни ҳисобга олганда) бозори ҳар йили 6,5 фоиздан ўсиб, 2020 йилга бориб унинг ҳажми 2,6 триллион доллардан ошади. Бу ҳақда Thomson Reuters ҳамда DinarStandard консалтинг компаниясининг Дубай амирлиги буюртмасига асосан тайёрланган глобал ислом иқтисодиёти тўғрисидаги ҳисоботида сўз боради, дейилади РБК хабарида.

Исломий шартлар, яъни тўнғиз гўшти, ўлимтик ва қон сингари тақиқланган хом ашёлар аралаштирилмай тайёрланган маҳсулотлар ҳажми 2020 йилга бориб 50 фоизга ошади ва 1,585 трлн долларни ташкил этади.

2014 йилда у 1,13 трлн доллар бўлиб, Хитой ва Америка маҳсулотлар бозоридан ($798млрд ва $741 млрд) ҳам ошиб кетди. Уч йилдан сўнг ҳалол маҳсулотлар улуши барча озиқ-овқат саноатининг 21,2 фоизидан иборат бўлади, дейилганди аввалги ҳисобот муаллифлари 2014 йилда.

Энг йирик ислом давлати — Индонезияда (аҳолиси 2015 йил сўнгида — 257,9 млн киши) ҳалол маҳсулотлар бозори ҳажми 2014 йилда 158 млрд долларни ташкил этди. Туркияда у 110, Покистонда — $100,5 млрд, Мисрда — $75,5 млрдга етди.

Ҳалол маҳсулотлар ишлаб чиқариш бўйича Nestlé корпорациясининг Малайзиядаги бўлинмаси —Nestlé Malaysia 1,1 миллиард долларлик пул айланмаси билан етакчилик қилмоқда. Компания ҳозирда 300дан зиёдроқ турдаги ҳалол маҳсулотларни ишлаб чиқармоқда.

Айни пайтда Бразилия, Буюк Британия, Франция, ЖАР ва Жанубий Корея каби давлатлар инвесторлари ҳам ҳалол маҳсулотлар ишлаб чиқаришга катта қизиқиш билдирмоқда. Хусусан, 2015 йилда Британиядаги A.F. Blakemore & Son Ltd улгуржи етказиб берувчиси Бруней ҳукуматига тегишли Ghanim International компанияси билан шартнома тузиб, мамлакатга Bruneihalal маркаси остида ҳалол маҳсулотлар етказилишини йўлга қўйди. Carrefour ва Tesco ретейл тармоқлари ҳам ўзларининг бир қатор ресторанларида ҳалол маҳсулотлар сотувини амалга оширмоқда. Шунингдек, Малайзиянинг Marrybrown ҳалол фастфуд тармоқлари ҳам жаҳонда кенг оммалашмоқда.

Бундан ташқари, Thomson Reuters`нинг 2014 йилдаги ҳисоботида ҳалол косметика ва дори воситалари бозори — $129 млрд, кўнгилочар хизматлар ҳажми эса 179 млрд долларга етди.

Ҳалол туризм ҳам кенг оммалашмоқда. Умра ва ҳаж зиёратини ҳисобга олмаганда, исломий туризм ҳажми бутун сайёҳлик соҳасининг 11 фоизини ташкил этмоқда. Ҳисобот муаллифларининг маълум қилишича, мазкур бозор айланмаси 230 миллиард долларга етган. 2020 йилга бориб эса у 233 миллиарддан ошади.