"Лестер" жамоаси бош мураббийи Клаудио Раньери АПЛнинг 24 тури доирасида "Ливерпуль"га қарши кечган ўйиндан (2:0) сўнг журналистларнинг саволларига жавоб қайтарди.

"Вардининг биринчи голи шунчаки ақл бовар қилмас даражадаги гол бўлди. Жейми ўта тез югуриш билан бирга тез фикрлаб, тез қарор қабул қилади. Қолаверса, бу вазиятда Маҳрез ҳам уни топа олди ва ажойиб пас билан таъминлади. Варди эса тўпни моҳирлик билан ўзига ўнглаб олиб ҳали ортга қайтишга улгурмаган рақиб дарвозабонини фантастик зарбаси билан доғда қолдирди.

Биз бу ўйинда савияли рақибга қарши прессинг билан сифатли ўйин кўрсатдик.

Футболчиларимнинг спорт формаси аъло даражада. Ҳозирда улар яхшилаб дам олишлари ва "Манчестер Сити"га қарши муҳим ўйинга тайёр бўлишлари керак. Ўша ўйинда шогирдларим жуда ҳам кўп югуришларига тўғри келади.

Биз ҳозирда ҳам ўзимизни босим остида қолгандек сезмаяпмиз. Футболчилар ўзларини жуда кўнгилдагидек ҳис қилишмоқда", дейди мураббий.