Ўзига хос дардли овози ва ижро услубига эга хонанда Отабек Муҳаммад Зоҳид “7х7” газетасига берган интервьюсида мухбирнинг “Нега баъзан самимий, баъзан кибрли кўринасиз” деган саволига доим яхши кайфиятда юриш, дилдаги дардларни кўзлар остига беркитиш қийинлигини айтиб, “Гоҳида арзимаган нарсадан жаҳлим чиқиб, ташқаридаги инсонларга кибрли кўринаман. Бундан ташқари, “Эгилганга эгил, кеккайганга кеккай” мақолига амал қиламан”, деб жавоб берди.

Маълумки, водийлик хонанда ўз концерт дастурида, тўйларда қўшиқларни жонли куйловчи саноқли ижодкорлар сирасига киради. Шу жиҳати билан санъат аҳли ва шинавандаларнинг меҳрини қозонган. Мавзу хусусида “Фонограмма – экран қаршисида ўтириб томоша қилишдек гап. Жонли ижродаги дастурда эса тингловчи хонанда билан бирга қўшиқ оламига кириб боради. Барча ташвишларини унутиб, руҳан покланади. Шу сабабли ҳар қандай даврада жонли куйлашга интилиш даркор”, дейди санъаткор.

Шунингдек суҳбат давомида саҳна кийими, қўшиқлари ва атрофдагиларга муносабатини баҳолайдиган, ҳар жиҳатдан у ҳақда қайғурадиган акаси борлиги учун синглиси Гулсанам Мамазотовага ҳавас қилишини айтган.