"Ўзбектелеком" акциядорлик компанияси 2016 йилнинг 1 февралидан Ўзбекистон провайдерларига интернет трафики нархини 1 Мбит/с учун 141,94 доллар миқдорида белгилади. Бу ҳақда компания сайтида хабар қилинган.

2016 йил январида интернет-провайдерлари учун белгиланган нарх 1 Мбит/с учун 156,24 доллар эди.

Интернет траффики нархи ушбу йилда яна бир неча бор пасайиши мумкинлиги айтилган.

Маълумот учун, 2015 йилда тарифлар 17 марта пасайтирилганди. 2015 йилнинг январида нарх 1 Мбит/с учун 259,29 долларни ташкил этган бўлса, декабрь ойига келиб, 157,60 долларни ташкил қилди.

Қайд этиш керакки, охирги йилларда Ўзбекистонда ахборот технологиялари ривожланишига алоҳида эътибор берилмоқда. Провайдерлар учун нархлар бир неча бор пасайтирилишига қарамасдан, интернет ишлаш тезлиги Тошкент шаҳридан бошқа ҳудудларда сезиларли даражада паст ҳолда қолмоқда. Шу билан бир қаторда, траффик ҳажми чекланмаган тарифлар сони ҳам кам.