Auto.ru порталида чет эллик фойдаланувчиларнинг минилган машиналарга бўлган қизиқиши кескин ошиб кетди, деб хабар бермоқда Россия матбуоти. 2016 йил январида улар декабрь ойига нисбатан икки баробар кўпроқ эълон ўқиган. Бу ҳақда портал тайёрлаган матбуот хабарномасида тушунтириш берилди.

“Биз бу ҳолатни доллар ва евро курсининг рублга нисбатан ўзгариши билан боғламоқдамиз, - дейилади хабарнома матнида. – Олиб сотарлар Россияда арзонлашган машиналарни харид қилиб, чет элга олиб чиқиб кетади, бу уларга манфаатли. Россия ва Европада бир хил машинанинг нархи ўртасидаги фарқ 30 фоизга етади”.

Портал мутасаддилари харид қилинган автомобилларнинг кейинги тақдирини кузатиб бормоқда. Хорижга олиб чиқилиб кетаётган машиналар сони жорий йил бошида 20 фоизга ошган.