Афғонистон шимолида жангарилар Ўзбекистон ҳудудидан ўтган электр ўтказгичларни ишдан чиқарди. Натижада, мамлакат шимоли ёруғлик нурисиз қолди. Мамлакат пойтахти Кобул шаҳридаги бутун бошли кварталлар электр токисиз ҳувиллаб қолган. Бу ҳақда Sputnik Dari хабар қилган.

De Afghanistan Breshna Sherkat Миллий энергетика корпорацияси "Толибон" томонидан электр ўтказгичлар линияларидан бири тўлиқ ишдан чиқарилгани ҳақида хабар қилган.

Террорчилар яна битта линияга ҳужум қилмоқчилиги таъкидланмоқда.

Афғонистон Энергетика ва сув таъминоти вазирлиги матбуот котиби Абдулбосид Абдий Sputnik мухбири билан бўлган суҳбатда айни пайтда беш миллионга яқин киши – мамлакат аҳолисининг олтидан бир қисми, номаълум муддатга электр таъминотисиз қолиши мумкинлиги ҳақида маълум қилди.

"Биз нима қила оламиз? Биз ожизмиз! Бу ерда айб мамлакат инфратузилмаси етарли даражада хавфсизлик билан таъминланмаганлигида. Модомики, электр ўтказгичларнинг асосий линиялари ўтган туманлар хавфсизлиги таъминланмас экан, на биз, на De Afghanistan Breshna Sherkat энергетика корпорацияси ушбу ҳолатни ўз кучи билан тўғрилай олмайди", дейди матбуот котиби.

У шунингдек, электр ўтказгичлари ўтган ҳудуд миналаштирилган бўлиши мумкинлиги ҳақида таъкидлаган.

"Брешна" ўз ишчилари ҳаётини хатар остига қўйиб, "Толибон" жангарилари томонидан шикаст етказилган линияларни созлаган тақдирда ҳам, кейинчалик, бу каби ҳужумлар яна такрорланмаслигига кафолат йўқ”, дея таъкидлади Абдулбосид Абдий.

Жамоатчилик томонидан ўтказилган босим ҳамда келиб тушган минглаб шикоят аризалари туфайли, Афғонистон Мудофаа вазирлиги электрўтказгичлар ўтган туманларни хавфсизлик билан таъминлашга тайёрлигини маълум қилди.

Аммо, тегишли чоралар қачон кўрилиши ҳақида ҳозирча аниқ маълумот йўқ.