2015 йил давомида Тошкент вилоятидаги 584 та фуқаролар йиғинида бирорта ҳам жиноят содир этилмаган. Бу ҳақда “Маҳалла” жамғармаси расмий сайтида маълум қилинди.

“Тошкент вилояти маҳаллалари фаолиятига оид кўрсаткичга назар ташлайдиган бўлсак, маслаҳатчиларнинг саъй-ҳаракати билан ўтган 2015 йил давомида вояга етмаганлар томонидан жиноят содир этиш ҳоллари 91 тага, нотинч оилалар сони 567 тага камайганига гувоҳ бўламиз”, - дейилади Тошкент вилояти Янгийўл туманида ташкил этилган ўқув-семинар тафсилотларига бағишланган хабарда.

Мазкур семинарда ўқув-семинарда маҳаллаларда ижтимоий-маънавий муҳитни соғломлаштиришда фуқаролар йиғинларининг диний маърифат ва маънавий-ахлоқий тарбия масалалари бўйича маслаҳатчиларнинг ўрни, Хотин-қизлар билан ишлаш бўйича комиссиялар билан уларнинг ўзаро ҳамкорлигини такомиллаштириш масалалари диққат марказида бўлди. Халқимизнинг маънавий қадриятлари, маданияти ва урф-одатига мутлақо ёт бўлган ғояларнинг тарқалишига қарши кураш, баркамол авлодни тарбиялашга доир тажрибалар ўртоқлашилиб, аниқ асосли мулоҳазалар тингланди.