2016 йилда Ўзекистон Республикаси Маданият ва спорт ишлари вазирлиги тасарруфидаги бир қатор театрлар ва томоша муассасалари бинолари реконструкция қилинади.

Бу ҳақда Маданият ва спорт ишлари вазирлигининг 2015 йил фаолият якунларига бағишланган Ҳайъат мажлисида маълум қилинди.

Хусусан, 2016 йилда Ўзбекистонда театрлар ва томоша муассасалари фаолиятини янада такомиллаштириш, уларнинг моддий-техника базасини кучайтириш, репертуарларни замон талабларига мос равишда шакллантириш, “Томоша” болалар мусиқий театрга ажратилган бинони реконструкция қилиш ва моддий-техник базасини мустахкамлаш, Республика болалар қўғирчоқ театри биносини қуриш, Муқимий номидаги ўзбек давлат мусиқали театри биносини реконструкция қилиш каби ишлар режалаштирилди.

Шунингдек, маданий мерос объектларини асл ҳолида сақлаш, хусусан, умумжаҳон маданий мероси рўйхатига киритилган “Бухоро тарихий маркази”, “Ичан қалъа”, “Самарқанд - маданиятлар чорраҳаси” ва “Шаҳрисабз тарихий маркази” муҳофаза қилиш ва фойдаланиш янада такомиллаштирилади.

Музейлар соҳасида амалга оширилиши лозим бўлган устувор вазифалар ҳамда музейлар фаолиятини ривожлантиришга қаратилган Қорақалпоғистон Республикаси, вилоятлар ва Тошкент шаҳри кесимида чора-тадбирлар дастури ишлаб чиқилади ҳамда музей кўргазма залларида Мустақиллик руҳиятини акс эттирувчи экспозициялар яратишни жадаллаштирилади.