Kia компанияси ўзининг иккинчи орқа узатмали седанини яратмоқчи; ҳозирча автоишлаб чиқарувчининг орқа ўққа узатма ўрнатилган ягона седани Quoris’дир. CK завод индекси билан юритилаётган моделнинг ишлаб чиқарилиши 2017 йил майидан бошланади. Бу ҳақда ўз манбаларига таянган ҳолда Reuters агентлиги хабар бермоқда.

Янги модель воситасида Жанубий Кореянинг етакчи компанияси ёш мижозлар учун спорт автомобиллари ишлаб чиқарувчи сифатидаги нуфузини мустаҳкамламоқчи. Режага мувофиқ, янги седан йилига 60 минг ададда сотилиши керак.

Янги модель BMW 4-Series ва Audi A5га рақобатчи бўлиши тахмин қилинмоқда. Седаннинг мотор гаммаси 2.0, 2.2 ва 3.0 л ли двигателлардан иборат бўлади. Модель Kia компаниясининг Сеул яқинидаги корхонасида йиғилиши айтилмоқда.